Car Insurance
E meta di e seguro aki ta pa garantisa esun perhudica pa accidente di trafico mas tanto posibel derecho riba pago pa e daño cu el a sufri.
Aki bao ta sigui en corto algun punto importante cu bo mester sa tocante e seguro aki. Tene cuenta si, cu ta trata solamente di algun punto en corto. Pesey ta importante pa tira un bista ariba e condicionnan di bo polisa:
1. E seguro ta cubri daño cu e chofer di e vehiculo sigura por causa na un otro persona of propiedad, te maximo e suma stipula den bo polisa.
a. Pa Ley (L.A.M.) esaki ta Awg.90,000.00, nos ta desconseha nos clientenan e cobertura aki mirando cu e gastonan cu ta envolvi den un accidente e ultimo añanan a subi drasticamente y hopi biaha ta surpasa e suma aki. Compania di seguro ta paga e ora ey te Awg.90,000.00 y e resto e asegurado mester paga. Nos ta conseha nos clientenan pa cuminsa ci Awg. 150,000.00 y purba pa subi esaki manera bo por pa Awg.300,000.00 cu ta un suma mas realistico.
2. Den caso di un acidente di trafico, semper mester yama Polis. Tambe mester yama Road Service di e compania di seguro. Si no yama Polis Compania di seguro no ta acepta bo claim.
3. Si bo vehiculo a causa daño na otro(tercera) bo mester bin haci un claim serca nos cu e chofer cu a causa e daño. Pa entrega un claim bo tin mester di:
a. Rijbewijs di e chofer cu a causa e daño.
b. Bo papelnan di seguro.
c. E formulario cu Road Service a duna bo.
4. Unabez cu compania di seguro a ricibi e claim nan ta pidi Polis e informacion oficial. Anos como broker ta pasa e informacion aki pa nos cliente.
5. Si bo bende bo auto, corda cu bo no por bende e seguro cu ne. Asina bo bende bo auto, bo mester trece e certificado di seguro pa nos mande bek na e compania di seguro pa cancelashon. Si no debolbe e certificado, y e auto ta envolvi den un accidente, abo ta keda responsabel pa cu e daño aki.
6. Si bo cambia auto of e number di bo auto, bo mester notifica bo broker imediatamente. Si esey no sosode, bo no tin seguro ariba e auto cu bo a cambia.
7. Si bo cancela bo seguro bo ta keda cu derecho pa usa e descuento acumula basta cu e periodo entre cancelashon y seramneto di seguro nobo no surpasa un aña.
8. E Ley Obligatorio tambe ta stipula cu pa cada accidente unda bo ta culpabel bo mester paga un propio riesgo(eigen risico) di Awg. 150.00 Excepcion pa cu esaki ta:
a. Ora e chofer tin menos di 23 aña compania di seguro ta hisa e propio riesgo aki of ora e chofer tin menos di 5 aña cu rijbewijs.
b. Ora e chofer no ta menciona riba e polisa compania di seguro tambe ta hisa e propio riesgo aki. Ta pesey ta importante pa bo menciona e chofernan cu ta maneha bo auto riba bo polisa.
9. E Ley Obligatorio(L.A.M.) tambe ta duna e asegurado e derecho pa bai directamente na e compania di seguro di esun responsabel si esaki no cumpli cu su deber. Den e caso aki abo(esun perhudica) mester paga e Awg.150.00 y ora esun cu a causa e daño paga esaki na su compania bo ta haye e suma aki bek.
Segun condicionnan di e polisa, compania lo no cubri dañonan causa- entre otro- pa e siguiente motibonan:
a. Si e persona cu a causa e daño no tin un rijbewijs valido.
b. Si e persona ta bao influencia di alcohol, y /of droga.
c. Si e persona no ta apto pa maneha auto, p.e. si e bai soño na wiel
d. Si e ta pusta cu e auto of kima taira of drift.
Fuera di seguro di auto obligatorio bo por haya un cobertura cu nos ta yama W.A. Plus pa bo auto basta cu e no tin mas di 8 aña. E seguro aki ta cubri :
• Cobertura cu ta segun e Ley Obligatorio (L.A.M.) • Candela
• Ladronicia of Joyriding • Explosion
Cada compania ta añadi un of mas cobertura na e seguro aki pero basicamente esakinan tur compania ta ofrece.
Tambe bo tin e posibilidad pa scoge pa un
cobertura “completo” conoci bao di e nomber
“All Risk”. E ta importante pa remarca cu aunke e nomber ta sugeri cu tur daño ta cubri esaki no ta e caso. E cobertura aki ta cubri no solamente e parti di e Ley Obligatorio(L.A.M.) pero tambe e ta cubri daño na bo auto sea cu bo ta culpabel of no.
Akinan bo tin basicamente dos cobertura:
1. Si bo auto ta nobo nobo(for di un dealer) bo por haya e seguro cu ta conoci bao diferente nomber depende di e compania di seguro:
“ full value; super cover of niewwaarde regeling”. E essencia di e cobertura aki ta cu den caso di un total loss den e prome 3 añanan nan no conoce depreciacion y bo ta haya un auto nobo bek di e mesun marca y balor. Despues di e 3 añanan aki bo cobertura ta cambia pa un asina yama “ All risk”. Ora bo tin un fiansa na Banco riba bo auto e cobertura aki ta un exigencia.
2. Bo tin tambe e seguro cu semper nos a conoce aki na Aruba cu ta e asina yama “All Risk”. E seguro aki tambe ta cubri daño na bo mes un auto pero ora di un total loss e compania ta aplica depreciacion. E depreciacion cu ta ser manteni aki na Aruba ta lo siguiente:
a. 1 aña >25%
b. 2 aña >20%
c. 3 aña >15%
d. 4 aña bai abao ta > 10%
Tur seguro di auto ta acumula pa aña 10 % di descuento si e cliente no a ocasiona un accidente durante e aña. Algun compania ta permiti e descuento aki yega te na 60% pa un seguro di Tercera Parti. Cu un seguro cu un cobertura di “All Risk” esaki por bai te cu 70% di descuento. Cada compania ta competi ariba e condicion aki cu ta duna e cliente diferente opcion pa scoge.
Seguro di Accidente pa Pasahero
Un auto bo no tine pa bo so. Hopi biaha bo tin hunto cu bo famia, amigonan y conocinan. Bo seguro di auto no ta cubri e daño cu bo pasaheronan sufri dor di un accidente cu bo auto. E seguro ta cubri e daño solamente ora abo ta ser poni responsabel dor di ley, esaki ta exclui miembronan di bo famia. Pesey e ta importante pa tin e seguro aki pa asina duna proteccion na bo famia den bo auto.
E sumanan asegura ta ser parti dor di e pasaheronan cu tawata den e auto durante e accidente.
E seguro di accidente pa pasahero ta mara na e auto cu bo tin sigura. Ora bo cambia bo auto, bo mester corda haci esaki tambe pa bo seguro di pasahero.
Tuma nota, cu cada compania tin nan mes un maneho, cual ta varia. Pesey e informacion cu nos a duna ta sujeto na cambio dependiendo di bo polisa di seguro vigente.
ENG 
